Hlutverk lífeyrissjóða er einungis að gæta fjármuna sjóðfélaga.

Það hlýtur nú að blasa við nær öllum, að fjárfestingar lífeyrissjóða landsmanna í Icelandair orka í besta falli tvímælis og í því versta glæpsamlegar, líkt og því miður má sömuleiðis fullyrða um fleiri fjárfestingar sömu sjóða.

Nú hlýtur mælirinn þó að vera fullur.

Ef áhættufjárfestar velja að halda sig fjarri, þá hlýtur það eitt og sér að vera næg ástæða fyrir stjórnendur sjóðanna að hafna frekari fjárútlátum í þessa botnlausu hít og reyna fremur að sleikja sárin.

Hvaða tilfinningar sem landsmenn kunna að bera til þessa aldna flugfélags, þá er það samt ekki hlutverk lífeyrissjóða okkar að vera þátttakendur í þessum vafasama leik.

Eignist hlut fari stuðningur yfir 100 milljónir

80 ár frá hernámi Íslands.

Í dag eru áttatíu ár liðin frá því að vopnaður breskur her gekk hér á land og hertók Ísland.

Þessi aðgerð var ekki framkvæmd með hagsmuni Íslands í huga, heldur einungis með hagsmuni Breta í fyrirrúmi, líkt og segja mætti líka um "Varnarsamninginn" við Bandaríkjamenn árið 1941.

Eins og ætíð tíðkast, þá er stór hluti hinnar hernumdu þjóðar ósáttur við ofbeldið, á meðan annar hluti landsmanna lætur sér vel líka og þjónar bókstaflega hinum nýju herrum til borðs og sængur og tekur í alla staði undir málflutning þeirra og gerir jafnvel enn.

Þó valtað hafi verið yfir hlutleysi, æru og stolt Íslendinga, þá gæti þessi hernaðaraðgerð þrátt fyrir allt hafa skipt sköpum um yfirráðin á Atlantshafi og þar með úrslitum styrjaldarinnar.

Endanlega búið hjá Biden.

Þrátt fyrir banvænar veirur og efnahags samdrátt í Bandaríkjunum mun Joseph Biden ekki ná að sigra núverandi forseta í komandi kosningum.
Þegar viðbætast ásakanir um kynferðislegt áreyti á árum áður, þá skiptir litlu þó Biden bjóði nú upp á kvenmann sem varaforsetaefni og þykist ekki muna eftir neinu ójöfnu og ekki bæta viðskiptatengsl sonar hans við mafíuna í Úkraínu heldur upp á vinningslíkur karlssins.

Líkt og fyrir fjórum árum síðan, þá hefðu demókratar betur kjörið Bernie Sanders til að takast á við hinn þjóðernissinnaða Trump og því fer sem fer.

Biden hafnar ásökunum

Mjór er mikils vísir.

Þessi nýi flutningasamningur er frábær stuðningur við Flugleiði á þessum síðustu og verstu tímum nú þegar flest helstu flugfélög heimsins standa á barmi gjaldþrots.

Líklegt verður að teljast að þessi tilteknu leiguflug til Evrópu séu fyrir atbeina kínverskra yfirvalda, sem með þessu litla verkefni vilja rétta lítilli vinaþjóð sinni hjálparhönd, því satt best að segja, þá eiga þeir líkast til sjálfir nægan flugvélaflota og varla myndu Lufthansa eða KLM fúlsa við flutningnum.

Eins og ég hef reyndar nýlega skrifað um hér á blogginu, þá væri upplagt fyrir Flugleiði að bjóða upp á (já, einmitt) beint flug á milli Íslands og Kína, því það gæfi sérstaklega Kínverjum á austurströndinni þægilegt tækifæri á að hefja eða ljúka hringferð sinni til hvort sem heldur Evrópu eða austurstrandar Bandaríkjanna.

Auðvitað gæfi þessi flugleið sömuleiðis Bandaríkjamönnum og Evrópubúum sama tækifærið á að slá fleiri flugur í einu höggi með millilendingu eða viðkomu á Íslandi.

Loks má ekki gleyma sívaxandi flutningum og ferðalögum okkar sjálfra til þessa fjarlæga heimshluta sem myndi vonandi spara okkur og alveg örugglega einfalda ferðalagið.

Icelandair flytur lækningavörur til Þýskalands

Nú er tækifæri til viðhalds og endurbóta.

Um þessar mundir hefur atvinnuleysi margfaldast, eins og liggur í augum uppi við þessar lamandi aðstæður sem eðlilega þýðir að öll ferðaþjónusta liggur niðri.

Þetta hefur í för með sér að tugir þúsunda verða atvinnulausir og lenda flestir á framfærslu hins opinbera um óákveðin tíma, en blasir það þá ekki við að nú er loks runnið upp tækifæri til að ráðast í viðhald og endurbætur á öllum helstu ferðamannastöðum landsins, sem á síðustu árum hafa bókstaflega verið fótum troðnir myrkranna á milli af tugum þúsunda ferðamanna, fyrir utan þá staðreynd að rándýrir iðnaðar-og verkamenn hafa ekki beinlínis legið á lausu.

Ég ímynda mér að í hópi þeirra á þriðja tugs þúsunda bústnu bæjar-og ríkisstarfsmanna sem á sinni könnu hafa að sjá um velferð og þrif þjóðfélagsins, hljóti að finnast einhverjir til þess bærir að sjá um og skipuleggja harðsnúna vinnuflokka sem á næstu mánuðum gætu t.a.m. komið svaðinu í kringum Geysi og allar hinar perlurnar í viðunnandi stand og má telja nokkuð öruggt að hægt væri að ná góðum samningum við nærliggjandi hótel um fæði og gistingu fyrir mannskapinn.

Mörg önnur þjóðþrifa verkefni bíða þess einungis að vaskir sveinar og meyjar taki sér kúst, pensil eða skóflu í hönd og þrífi og lagi t.d. grút-skítuga höfuðborgina, auðvitað undir leiðsögn sérfræðinga borgarinnar.

Sérstakt átak til að ná útlendingum í skimun

Sjúklegar áhyggjur af þróun Kína

Ég hef undanfarið ítrekað rekist á pistla og greinar, þar sem nafngreindir einstaklingar láta í ljós áhyggjur og jafnvel ótta yfir vaxandi áhrifum Kínverja og að sama skapi augljósri hrörnun þeirra vestrænu stórvelda sem drottnað hafa yfir flest öllu hér á jörðinni undanfarin árhundruð.

Það hefur auðvitað vakið upp eðlilegar spurningar og vangaveltur að þessi eitraði vírus sem er að leggja líf okkar og öll kerfi á hliðina, er álitinn eiga upptök sín í Kína, en eins lengi og ég man þá hefur árleg flensa ætíð verið sögð frá Asíu og síðan má ekki gleyma hinni svokölluðu Spönsku-veiki sem reyndar átti upptök sín í herstöð í Kansas, þaðan sem hún barst til Evrópu með hermönnum sem hugðust leggja bandamönnum lið, en varð reyndar til þess að tugir milljóna Evrópubúa á besta aldri létu lífið.

Mergurinn málsins er að veirur og plágur munu því miður ætíð halda áfram að hrella okkur.

Hvað ítrekuð níðskrifin um Kína snertir, þá ber það nú helst að mínu mati vott um skert minni eða höfnun á staðreyndum, þegar aðgerðir og athafnir svokallaðra bandamanna okkar er virtar og lofsamaðar og endist mér varla aldur til að telja upp þau augljósu ódæði og lygar á borð við söguna um gereyðinga vopn Saddams, sem þessir augljósu óvildarmenn Kínverja hafa gleymt og liggur það ekki í augum uppi að Kínverjar eiga frekar erindi í S-Kínahafi heldur en Bandaríkjamenn?

Broslegasta dæmið um taugaveiklislegan Kína óttann sá ég í morgun, þegar birt var smáfrétt hér í blaðinu um brú sem hrundi á Ítalíu og var þá ekki að spyrja að því, að skömmu síðar var komið blogg viðhengi við fréttina, sem bar yfirskriftina: "Svona fer þegar maður fer Kínaleiðina"
Þarna álít ég að dæmi um hinn töluvert algenga Dunning-Kruger "effect" sé að ræða, því mig grunar að þessi óttaslegni bloggari hafi aldrei svo mikið sem stigið fæti sínum á kínverska jörð, líkt og líklega á við um flesta áköfustu skoðanabræður hans í Kína skelfingunni - því miður.

Ein og hálf milljón hefur greinst með kórónuveiruna

Auralausir lífeyrissjóðir?

Úrsögn stjórnarmanna úr miðstjórn ASÍ hlýtur að vekja grunsemdir um að eitthvað meira en lítið hrjái vellauðuga lífeyrissjóði okkar, sem fullyrt er að eigi yfir fimm þúsund milljarða króna.

Illa innrættir samsæriskenninga smiðir hafa reyndar látið í veðri vaka að þegar á reyndi, þá kæmi í ljós að fremur lítið færi fyrir öllum auðæfunum, því þau hefðu bara einhvern veginn glatast, horfið eða bara verið stolið.

Nú er sú stund runninn upp að á reynir og einstaklingar og fyrirtæki landsins þarfnast sárlega þessa stuðnings, en þá lítur út fyrir að svo lítið fé sé í hirslum lífeyrissjóðanna, að þeir geti ekki beðið með greiðslur iðgjalda í fáeinar vikur, líkt og um eignalausa gegnumstreymis sjóði væri að ræða.

„Versta leiðin var valin, að gera ekki neitt“

Viðskiptahugmynd fyrir Icelandair.

Þegar hylla tekur undir endalok COVID-19 faraldursins verða íslenskir ferðaþjónustu aðilar að hefja stórsókn að því að ná aftur fyrri markaðshlutdeild og helst gott betur, því sveltur ferðamálaiðnaður Evrópu og reyndar heimsins alls, munu sannarlega ekki liggja á liði sínum í litríkum áróðri í þeim gjöfula iðnaði á komandi mánuðum.

Lykillinn að blómstrandi framtíð íslensks ferðaiðnaðar er að mínu mati ferðaglöð kínversk millistétt, sem einhverra hluta vegna hefur undanfarið í auknum mæli valið að hafa Ísland með í Evrópuferð sinni og mun ég nú í stuttu máli reyna að útskýra hvernig ég álít að Flugfélag Íslands (Icelandair) gæti haft hag af þeirri þróun.

Sívaxandi Evrópuferðir Kínverja eru oftast í skipulögðum hópum og virðast þeir oftast velja fjögur til fimm lönd í Schengen Evrópu sem áfangastaði í þessari sannkölluðu hraðferð þeirra, sem oftast er aðeins u.þ.b. tíu daga löng.

Icelandair sem augljóslega á í vök að verjast og er eins og allir vita rekið á kostnað íslenskra skatt- og lífeyrisþega, verður að horfast í augu við þá staðreynd, að annaðhvort þurfa að draga úr umsvifum eða auka.

Félagið sem hefur nú aðeins á að skipa örfáum gömlum þotum í lággjalda klassa, reyndar með harðsnúnum áhöfnum hoknum af reynslu, getur einfaldlega ekki staðist samkeppni við öflug evrópsk og bandarísk flugfélög sem bjóða upp á langdrægar breiðþotur sem gera hina fyrrum nauðsynlegu millilendingu í Keflavík óþarfa.

Evrópsk félög á borð við SAS og Finnair, bjóða í sívaxandi mæli upp á ferðir á milli Kína og Íslands með millilendingu í Evrópu sem fjölmargir Kínverjar og ásamt Íslendingum notfæra sér. Það sýnir að fjölmargir kínverskir ferðalangar velja þá rökréttu leið að hefja eða ljúka hringferð sinni um Scengen-Evrópu á Íslandi.

Ef Icelandair byði upp á daglegar ferðir í nýjum breiðþotum (auðvitað með fullri þjónustu) til Peking/Shanghæ, helst í samvinnu við öflugt kínverskt flugfélag, þá álít ég að bráðlega yrði næg eftirspurn eftir þessari nýju leið , því þá gæfist ferðamönnunum einfaldlega færi á að hefja eða ljúka Evrópuferðinni á Íslandi án tímafrekra millilendinga.

Bein flugleið milli Íslands og Kína, byði líka upp á möguleika á tengiflugi milli Kína og austurstrandar Bandaríkjanna, sem er önnur saga.

Aðeins sex flugferðir áætlaðar alla helgina

Íslenska aðferðin.

Það er allt við það sama hér á Íslandi, eins og augljóslega kom fram í kvöldfréttum RÚV í gærkvöldi.

Ekki var minnst einu orði á að Danir væru búnir að loka öllum landamærum, höfnum og flugvöllum, auk skólum og öðrum mannfundum nánast frá þeirri stundu er tilkynningin var lesin, sem sýnir ágætlega andvaraleysi fréttamanna okkur sem þiggja laun fyrir að fylgjast m.a. með erlendum fréttum.

Hitt er síðan munurinn á tímasetningum aðgerða Dana og hinsvegar Svandísar og félaga, sem ætla að herða aðgerðir í baráttunni við veiruna eftir helgi!

Danir loka landamærum

ISIS á flótta.

Líkt og allir sigraðir herir, þá eru eftirlifandi hermenn ISIS á örvæntingarfullum flótta undan örlögum sínum með frillur sínar og afkvæmi nú þegar stríðið er tapað og allra þessara ungu málaliða bíður því einungis að horfast í augu við dóm sýrlensku þjóðarinnar.

Það kemur ekki á óvart að þessir fyrrum málaliðar beiti nú fyrir sig konum og börnum með dyggum stuðningi vestrænna fjölmiðla, sem keppast nú við að vekja samúð með þessum fyrrum böðlum.

Líkt og þögn og samþykki okkar vesturlandabúa sýndi ljóslega þegar Bandamenn hervæddu þessa dulbúnu innrás í Sýrland þá kemur enn minna á óvart hve létt reynist að vekja samúð meðal barna og kvenna á örlögum þessara karla, nú þegar leikurinn er tapaður.

Hvetur til stillingar við landamæri Tyrklands